مجموعه اشعار حئیران خانوم

[اولدوز]

دويمورام هر نه قدر گؤزلريوه گؤز تيكيرم
نئيله ييم كي باخيشيندان عشق جامين ايچيرم
سنله هر يئرده وارام ايسته ميرم هئچ كسي من
آخي سن سن منه هامّي ، منه حامي سن سن
گؤزلرين دونيا منه ، هر نفسين صون نفسيم
مني تك قويما گينان اي منه سن هامّي كسيم
تكجه قورخوم بودوكي عاشيقيوي تك قوياسان
نئيله ييم بير گون اگر سن عاشيقيندن دوياسان
ايسته رم هميشه منله اولاسان، آتما مني
حيرانام سندن اوتور ، اؤزگه لره قاتما مني

 

[اولدوز]

گلميشم گؤزلرينين گؤرماقينا نازلي ياريم
مني قئيترمه الي بوْش باشيوا من دوْلانيم
نه گليب گولوم سنه دردين آليم سؤيله منه
ده گؤروم نه گلدي بيردن گؤزه ليم گولوم سنه
هاني اوْل قامت رعنا هاني اوْل حسن جمال
هارا گئتدي گؤزه ليم اي بئله سنده عشق و حال
سن كي يئرده اوْتومازدين گؤرورم كي ياتميسان
منه سن باخاردين اي گول نيه بس دا باخميسان
مني سن گؤرنده اي گول سئوينردين گؤزه ليم
بير اوْيان آچ گؤزونو گؤركي الينده دير اليم
من سنه جانيمي وئررم ايه لايق بوله سن
آلارام شادليقي من جانيمه بيرده گوله سن

 

[اولدوز]

سن گئدنده باغچادا گوللر قارا آچدي ياريم
سن گئديب دا گلمه دين تك قالميشام من دلداريم
سوْلدي گوللر بولبولون حالي يامان اوْلدي يامان
باغلاميشديق عهد و پيمان اوْل يالان اوْلدي يالان
ايلديريم شاخدي قارا يئللر دالينجان اَسديلر
هر گلن بير سؤز دئدي صبريمي ياريم كسديلر
گؤزلريمه دوْلدي حسرت ياغيشي سن گلمه دين
باغچادا گوللر خزان اوْلدي ولي سن گلمه دين
باغريما دوْلدي بير آتش ياخدي يانديردي مني
يئل ووراندا اوْل اَلوْولور ياديما سالير سني
چكدي حيران چوْخ شماتت اما دؤزدي دينمه دي
اوْل ائشيتدي هامميدان كيم ياري گئتدي گلمه دي

 

[اولدوز]

گاه با مکتوب ما را یاد ساز

خاطر غمدیدگان را شاد ساز

لااقل اى مه سپهر وفا

گاه با نامه یاد ساز مرا

نیست لایق ایا مه تابان

خلق گویند بى‌وفاست فلان

 

[اولدوز]

گؤزومي ياشلي قويوب گئتدين اوزاقدان باخيسان
مني انكار ائله ييب عشقيميزي سن دانيسان
او سنيدين كي مني عشقه دچار ائيله ميسن
ايندي بيگانه اولوب اؤز ياريوا ، يار دئميسن
ده گينن غير محبت نه دئميشديم سنه من
كي گئديب اؤز داليوا باخمياسان بير داها سن
سن بيليرسن كي گوناهسيز مني ترك ائيله ميسن
سن يالان سويله دين عشقه ، سن يالانين اؤزوسن
يوخدو منده هئچ گناه اما بوني اينانمادين
سن بو حيران عاشيقين كؤنلونو هئچ آلانمادين

 

[اولدوز]

اوزولوب ياردان اليم دونيا قارانليقدي منه
دوتولوب نفس يولي اود وورولوبدي خرمنه
آلديلار ياريمي الدن سينه مي اوخلاديلار
بو پريشان حاليما هامّي اوره ك داغلاديلار
دويماميشديم من او ياردان ولي يار آتدي مني
دوتدي اؤزگه اليني گؤر او كيمه ساتدي مني
دوزدي يوخدي اما من اونون يادينان ياشيرام
ياريمين يوخلوقونو وارلوقونا اوخشا ديرام
ديييرم كي بو اودي گؤزلريمه جيلوه لنير
بو خيالينلا سنين حيرانيوا اود النير

 

[اولدوز]

سني سئوديم او قدر كي اؤلرم اؤل دئيه سن
ائدرم جانيمي تقديم سن اگر ايستيه سن
گؤزلريوين باخيشي بو اوره گي پارچالايير
سحرين يئلي سنين تللريوي خوش دارايير
نه گؤزلدي، نه قيامت ائليري او قامتين
داها سندن اوزاق اولماق منه يار اولور چتين
من سنه عادت ائديب سندن اوزاق گئدنميرم
اولماياندا كناريندا ، دانيشيب گولنميرم
داريخير اوره ك سني بير گون اگر گؤرنمييم
او گؤزل ساچلاريوي من داراييب هورنمييم
حيرانام قال منه سن ، سن سيز حيات يوخدي منه
قال كي اؤره نميشم اي روح و روان داها سنه

 

[اولدوز]

گئتمه قال اي درد و درمانيم آماندور گئتمه قال
قوي دئييم ديوانيم چوخدان زماندور گئتمه قال
وئر منه فرصت گولوم تا گؤز تيكيم گول چهره وه
گئتمه كي سن سيز حاليم چوخ چوخ ياماندور گئتمه قال
قوي دوتوم نازلي نيگاريم من سنين او اللرين
سؤيلييم سندن صورا حاليم فغاندور گئتمه قال
من دولاننام باشيوا قويما مني يالقيز قاليم
گئتمه كي عاشق گؤزوم چندور، دوماندور گئتمه قال
سن مني دينديرمه كي اينديجه دي كي آغليام
گؤزلريوي ناز باخيشلا آز دولاندور گئتمه قال
گل بو يولدان سن قاييت يوخسا من اؤللم قالمارام
حيرانام سندن اؤتور من آيري يارا باخمارام

 

[اولدوز]

ای ستمگر منی رسوای جهان ایلمیسن

گوزومون یاشینی چون دجله روان ایلمیسن

همنشین ایلمیسن دشمنی ای مایه ناز

رشگدن جانیم آلیب، باغریمی قان ایلمیسن

 

[اولدوز]

آچاندا گوزلرین آلیر بو جانی یاتاندا فتنه دورانه بنزر

باخاندا نازیله تیر نیگاهین کونولده خنجر بررانه بنزر